കണ്ണൂര്‍: കണ്ണൂര്‍ പൊടിക്കുണ്ടില്‍ ഓടിക്കൊണ്ടിരുന്ന ബസിന് തീപിടിച്ചു. കണ്ണൂര്‍ നഗരത്തില്‍ പള്ളിക്കുന്ന് പൊടിക്കുണ്ടിലെ മില്‍മക്ക് സമീപമാണ് സംഭവം. പുക ഉയര്‍ന്നതോടെ യാത്രക്കാരെ മുഴുവന്‍ ഇറക്കിവിട്ടതിനാല്‍ വന്‍ ദുരന്തം ഒഴിവായി. ആര്‍ക്കും പരിക്കില്ല.
പാലിയത്ത് വളപ്പ്-കണ്ണൂര്‍ റൂട്ടിലോടുന്ന മായാസ് എന്ന ബസിനാണ് തീപിടിച്ചത്. ബസ് പൂര്‍ണമായും കത്തിനശിച്ചു. 50ല്‍ അധികം യാത്രക്കാരാണ് ബസില്‍ ഉണ്ടായിരുന്നത്. ചൊവ്വാഴ്ച രാവിലെ 9.45ഓടെയാണ് സംഭവം. നാട്ടുകാരും ഫയര്‍ഫോഴ്സും ചേര്‍ന്ന് തീയണച്ചു.
ബസ് പൂര്‍ണമായും തീ പിടിക്കുന്നതിന് മുമ്ബ് എല്ലാ യാത്രക്കാരേയും സുരക്ഷിതരായി പുറത്തിറക്കാന്‍ ജീവനക്കാര്‍ക്ക് സാധിച്ചതിനാല്‍ ആര്‍ക്കും പരിക്കേറ്റില്ല. ഡ്രൈവറുടെ സീറ്റിന്‍റെ സൈഡില്‍ നിന്ന് തീപ്പൊരി ഉയരുന്നതാണ് ആദ്യം ശ്രദ്ധയില്‍പ്പെട്ടത്. തുടര്‍ന്ന് പുക ഉയരാന്‍ തുടങ്ങി. ഡ്രൈവര്‍ ബസ് സൈഡിലേക്ക് ഒതുക്കി, യാത്രക്കാരോട് ഇറങ്ങാന്‍ ആവശ്യപ്പെടുകയായിരുന്നു. ഇറങ്ങുന്നതിനിടെ തന്നെ തീ ആളിപ്പടര്‍ന്നു. യാത്രക്കാര്‍ പുറത്തിറങ്ങിയതിന് പിന്നാലെ ബസ് പൂര്‍ണമായും ആളിക്കത്തി തീപിടിച്ചു.
