രാത്രി യാത്രികര്‍ക്ക് വിശ്രമിക്കാന്‍ കെ എസ് ആർ ടി സി ബസുകള്‍ ഒരുക്കുന്നു. നഗരങ്ങളെ ഒഴുവാക്കി പുതുതായി കെ എസ് ആർ ടി സി ആരംഭിക്കുന്ന തിരുവനന്തപുരം - കോഴിക്കോട് സർവ്വീസിലെ യാത്രികർക്ക് ചങ്കുവെട്ടിയിൽ വിശ്രമിക്കാന്‍ ആണ് വിശ്രമ ബസുകള്‍ ഒരുക്കുന്നത്. തിരുവനന്തപുരം - കോഴിക്കോട് ബസിൽ യാത്ര ചെയ്യാനുള്ള
മലപ്പുറത്തുനിന്നുള്ള രാത്രി യാത്രക്കാരെ ചങ്കുവെട്ടിയിലേക്ക് സൗജന്യമായി എത്തിക്കുകയും ചെയ്യും. കാത്തിരിപ്പു കേന്ദ്രമായി ഉപയോഗിക്കാന്‍ രണ്ടു ലോ ഫ്ലോർ ബസുകളാണ് തയ്യാറാക്കിയിട്ടുള്ളത്. ഈ ബൈപ്പാസ് സ്റ്റേഷന്‍ ബസുകള്‍ മലപ്പുറം ഡിപ്പോയില്‍ എത്തിക്കഴിഞ്ഞു.
മലപ്പുറത്തുനിന്ന് രാത്രിസമയത്ത് ദീര്‍ഘദൂര സര്‍വീസുകള്‍ കുറവാണ്. അതിനാല്‍ ചങ്കുവെട്ടിയിലെത്തി ബസ് പിടിക്കണം. ഇതിനായി ചങ്കുവെട്ടിവരെ ഓട്ടോറിക്ഷയോ മറ്റു വണ്ടികളോ പിടിക്കണം. പദ്ധതിയിലൂടെ കെ.എസ്.ആര്‍.ടി.സി അധികൃതര്‍ ടിക്കറ്റ് ബുക്ക് ചെയ്ത യാത്രക്കാരെ ചങ്കുവെട്ടിയില്‍ എത്തിച്ചുനല്‍കും. അവിടെ തെക്ക്, വടക്ക് ഭാഗങ്ങളിലുള്ള കാത്തിരിപ്പുകേന്ദ്രങ്ങളില്‍ ലോഫ്‌ളോര്‍ ബസുകള്‍ നില്‍കുന്നുണ്ടാകും. ബുക്ക് ചെയ്ത ബസ് വരുന്നതുവരെ അവിടെ വിശ്രമിക്കാം. ബസില്‍ വൈദ്യൂതി വെള്ളം തുടങ്ങിയ സൗകര്യങ്ങള്‍ ഉണ്ടായിരിക്കും. നിലവില്‍ ചങ്കുവെട്ടിയില്‍നിന്ന് കയറുന്നവര്‍ക്ക് മലപ്പുറത്തുനിന്ന് ബുക്ക് ചെയ്യാനുള്ള സൗകര്യമില്ല. പദ്ധതി വന്നാല്‍ ചങ്കുവെട്ടിയെ ആശ്രയിക്കുന്നവര്‍ക്കും മലപ്പുറത്തുനിന്ന് ടിക്കറ്റ് ബുക്ക് ചെയ്യാം.
