കരിപ്പൂര്‍: കോഴിക്കോട് വിമാനത്താവളത്തില്‍ വന്‍ സ്വര്‍ണവേട്ട. നാല് സ്ത്രീകള്‍ ഉള്‍പ്പെടെ 20 പേരില്‍ നിന്നായി 23 കിലോഗ്രാം സ്വര്‍ണമാണ് പിടികൂടിയത്. കൊച്ചി കസ്റ്റംസ് പ്രിവന്‍റിവ് കമീഷണറേറ്റിലെ ഉദ്യോഗസ്ഥര്‍ നടത്തിയ പരിശോധനയിലാണ് പത്ത് കോടിയിലധികം മൂല്യമുള്ള സ്വര്‍ണം പിടികൂടിയത്.
കള്ളക്കടത്ത് സ്വര്‍ണം എത്തുന്നതായ രഹസ്യവിവരത്തിന്‍റെ അടിസ്ഥാനത്തില്‍ ഡെസേര്‍ട്ട് സ്റ്റോം എന്ന പേരിലായിരുന്നു പ്രത്യേക പരിശോധന. പ്രിവന്‍റിവ് അഡീഷനല്‍ കമീഷണര്‍ എം. വസന്തകേശന്‍, അസി. കമീഷണര്‍ പി.ജി. ലാലു എന്നിവരുടെ നേതൃത്വത്തില്‍ 30 അംഗ സംഘമാണ് പരിശോധനക്കെത്തിയത്. കോഴിക്കോട് കസ്റ്റംസ് പ്രിവന്‍റിവ് ഡിവിഷനിലെ ഉദ്യോഗസ്ഥരും സംബന്ധിച്ചു. ചൊവ്വാഴ്ച രാത്രി പത്ത് മുതല്‍ ബുധനാഴ്ച ഉച്ചക്ക് ഒന്നു വരെയയിരുന്നു പരിശോധന.
ദുബൈ, അബൂദബി, ജിദ്ദ എന്നിവിടങ്ങളില്‍നിന്ന് ഏഴ് വിമാനങ്ങളിലെത്തിയ യാത്രക്കാരില്‍നിന്നാണ് സ്വര്‍ണം കണ്ടെടുത്ത്. ശരീരത്തിനുള്ളിലും അടിവസ്ത്രത്തിനുള്ളിലും ഒളിപ്പിച്ചു കടത്താന്‍ ശ്രമിച്ച സ്വര്‍ണമിശ്രിതവും പിടികൂടിയവയില്‍ ഉള്‍പ്പെടും. സ്വര്‍ണത്തിന് പുറമെ രണ്ട് കാറുകളും കസ്റ്റംസ് വിഭാഗം പിടിച്ചെടുത്തു. സ്വര്‍ണം അയച്ചവരെ കണ്ടെത്താന്‍ കസ്റ്റംസ് അന്വേഷണം പ്രഖ്യാപിച്ചു.
