പരപ്പനങ്ങാടി: ഭാര്യയെ കഴുത്തിന് കൈ കൊണ്ട് അമര്‍ത്തിപ്പിടിച്ചും ചെയിന്‍ ഉപയോഗിച്ച്‌ കഴുത്തില്‍ മുറുക്കിയും ശ്വാസം മുട്ടിച്ച്‌ കൊല്ലാന്‍ ശ്രമിക്കുകയും 13 വയസുള്ള മകളെ ദേഹോപദ്രവം ഏല്‍പ്പിക്കുകയും ചെയ്ത കേസില്‍ യുവാവ് അറസ്റ്റില്‍. ചെട്ടിപ്പടി കോയംകുളം വെട്ടിക്കുത്തിനകത്ത് വീട്ടില്‍ മൊയ്തിന്‍ കുഞ്ഞിന്റെ മകന്‍ സൈനുല്‍ ആബിദിനെയാണ് (40) പരപ്പനങ്ങാടി പൊലീസ് അറസ്റ്റ് ചെയ്തത്.
ഭാര്യയെ സ്ത്രീധനത്തിന്റെ പേരില്‍ ദേഹോപദ്രവം ഏല്‍പ്പിച്ചതിന് 2020ല്‍ പ്രതിയുടെ പേരില്‍ കേസ് പരപ്പനങ്ങാടി പൊലീസ് സ്റ്റേഷനില്‍ രജിസ്റ്റര്‍ ചെയ്തിരുന്നു. ഈ കേസ് നിലവില്‍ പരപ്പനങ്ങാടി കോടതിയുടെ പരിഗണനയിലാണ്. അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി തിരൂര്‍ സബ് ജയിലില്‍ 14 ദിവസത്തേക്ക് റിമാന്റ് ചെയ്തു.
പരപ്പനങ്ങാടി എ.എസ്.ഐ പരമേശ്വരന്‍, പൊലീസുകാരായ ദിലീപ്, അനില്‍, രാമചന്ദ്രന്‍,സനല്‍ എന്നിവരുടെ നേതൃത്വത്തിലാണ് അന്വേഷണം.
