രാമനാട്ടുകര: പിഞ്ചുകുഞ്ഞിനെ റോഡരികില് ഉപേക്ഷിച്ച നിലയില് കണ്ടെത്തിയ സംഭവത്തില് അമ്മ കസ്റ്റഡിയില്. ഒരു മാസത്തില് താഴെ മാത്രം പ്രായമുള്ള ആണ്കുഞ്ഞിനെയാണ് റോഡരികില് ഉപേക്ഷിച്ചത്.
രാമനാട്ടുകര വൈദ്യരങ്ങാടി സ്വദേശി ഫാത്തിമയാണ് അറസ്റ്റിലായത്. ഭര്ത്താവ് ഉപേക്ഷിച്ചത് കാരണം കുഞ്ഞ് ബാധ്യത ആവുമെന്ന് കരുതിയാണ് കുഞ്ഞിനെ ഉപേക്ഷിച്ചതെന്ന് ഫാത്തിമ പൊലീസിനോട് പറഞ്ഞു. പുലര്ച്ചെ അഞ്ചുമണിക്ക് ഇതര സംസ്ഥാന തൊഴിലാളികളാണ് തോട്ടുങ്ങല് നീലിത്തോട് പാലത്തിന് സമീപം വഴിയരികില് പിഞ്ചുകുഞ്ഞിനെ ആദ്യം കണ്ടത്.
സമീപവാസികളെയും പൊലീസിനെയും വിവരമറിയിച്ചു. സ്ഥലത്തെത്തിയ ഫറോക്ക് പൊലീസ് കുഞ്ഞിനെ ആദ്യം താലൂക്ക് ആശുപത്രിയില് എത്തിച്ചു. ആരോഗ്യ പ്രശ്നങ്ങളില്ലെങ്കിലും പരിചരണത്തിനായി മെഡിക്കല് കോളജ് ആശുപത്രിയിലേക്ക് മാറ്റി. കുഞ്ഞിനെ ആദ്യം കണ്ട ഇതര സംസ്ഥാന തൊഴിലാളികളുടെ മൊഴി രേഖപ്പെടുത്തി.
