പൊന്നാനി: റേഷന്‍ ഭക്ഷ്യ ധാന്യങ്ങളില്‍ തിരിമറി നടക്കുന്നുണ്ടെന്ന പരാതിയെത്തുടര്‍ന്ന് സിവില്‍ സപ്ലൈസ് വിജിലന്‍സി‍െന്‍റ നിര്‍ദേശപ്രകാരം നടന്ന മിന്നല്‍ പരിശോധനയില്‍ പൊന്നാനി സപ്ലൈകോ ഗോഡൗണിലെ സ്റ്റോക്കില്‍ വന്‍ ക്രമക്കേട് കണ്ടെത്തി. പൊന്നാനിയിലെ രണ്ട് ഗോഡൗണുകളില്‍ നടന്ന പരിശോധനയില്‍ 35 ക്വിന്‍റല്‍ ഗോതമ്ബും 34 ക്വിന്‍റല്‍ അരിയും കുറവുള്ളതായി കണ്ടെത്തി.
കഴിഞ്ഞ ഒമ്ബത് മാസത്തെ സ്റ്റോക്കാണ് പരിശോധിച്ചത്. പച്ചരി, മട്ട, പുഴുക്കലരി എന്നിവയില്‍ വന്‍കുറവാണ് കണ്ടെത്താനായത്. രാവിലെ ഒമ്ബത് മുതല്‍ പൊന്നാനി തൃക്കാവിലെ പി.സി.സി സൊസൈറ്റി ഗോഡൗണ്‍, തൃക്കാവിലെ സ്വകാര്യ ഗോഡൗണ്‍ എന്നിവിടങ്ങളിലാണ് പരിശോധന നടന്നത്. സിവില്‍ സപ്ലൈസ് ഗോഡൗണുകളില്‍ സൂക്ഷിച്ച രജിസ്റ്ററും സ്റ്റോക്കും ഉദ്യോഗസ്ഥര്‍ ഒത്തു നോക്കി.
തൃക്കാവിലെ സ്വകാര്യ ഗോഡൗണില്‍ നൂറുകണക്കിന് ചാക്ക് പച്ചരിയും പുഴുക്കലരിയും തരം തിരിക്കാതെ വെച്ചതായി പ്രാഥമിക പരിശോധനയില്‍ കണ്ടെത്തി. ഇത് സംബന്ധിച്ച്‌ കൂടുതല്‍ പരിശോധന നടത്താനാണ് തീരുമാനം.
കഴിഞ്ഞ ഒമ്ബത് മാസത്തെ രജിസ്റ്ററും സ്റ്റോക്കും തമ്മില്‍ വലിയ അന്തരമാണ് കണ്ടെത്താനായത്. എഫ്.സി.ഐ ഗോഡൗണില്‍നിന്ന് കൃത്യമായി നല്‍കുന്ന ഭക്ഷ്യസാധനങ്ങളില്‍ കുറവ് കണ്ടതിനെക്കുറിച്ചും അന്വേഷണം നടത്തും. എന്നാല്‍ സ്വാഭാവികമായി സ്റ്റോക്കുകളില്‍ ഉണ്ടാകുന്ന വ്യത്യാസം മാത്രമെ കണ്ടെത്തിയിട്ടുള്ളതെന്നാണ് ബന്ധപ്പെട്ട അധികൃതര്‍ നല്‍കുന്ന വിശദീകരണം. സിവില്‍ സപ്ലൈസ് വിജിലന്‍സി‍െന്‍റ നിര്‍ദേശപ്രകാരം തിരൂര്‍ താലൂക്ക് സപ്ലൈസ് ഓഫിസര്‍ ജോര്‍ജ് കെ. സാമുവല്‍, തിരൂര്‍ താലൂക്കിലെ റേഷനിങ് ഇന്‍സ്‌പെക്ടര്‍മാരായ കെ.കെ. രാജന്‍, എസ്.സി. ബിബിന്‍, വി. ഗീതാകുമാരി, എ.എം. ബിന്ധ്യ, ജീവനക്കാരന്‍ പി. അബ്ദുല്‍ റസാഖ് എന്നിവര്‍ പരിശോധനക്ക് നേതൃത്വം നല്‍കി
